يا ارض بور

ما فهاش لا زاد ولا مايه

يا سكه سّكه

ع الامل والضى

انا لسه عايش

رغم ان الروح

مش حاسه خالص انى واحد حى

ياحلم ضاع فى القلب

جوه الروح

ياحد سيف السكات

يقطع لسان البوح

انا لسه عشمان فى اللى جاى

يفتح بيبان الكلام

حتى ولو بالنوح

ياالف حرف ومخنوقين

فوق اللسان

ياالف حلم ومحبوسين

خلف القضبان

انا لسه كاتم صرختى فى الحلق

لكنى خايف يطلع الصوت من الودان

يافرحه طارحه ع الخدود الوردى

يابسمه واخده ع الشفايف عهد

انا لسه ليا وسطكم مكان

ولا الجراح ع القلب صبحت وعد

ياعيون صبيه شقيه باصه من الشباك

يابسمه تنده على وتقولى باستناك

انا لسه تانى هاعانى وحدى من الاوهام

هفضل هنا

وخليكى انتى هناك

يافكر بكر وخصب جوايا

ياقلب دافى وفى الصفا معايا

ليه الطيابه فى زمانا

صاحبها يصبح مابين الخلق سلايه

ياطيبين الفؤاد والطهر جواكم

ياحافظين الوداد والعهد لساكم

انا لسه برضو زيكم ابيض

مهما سواد الزمن ع الوش يتراكم

ياغربه ماده جذورها جوه القلب

ياوحده واخده من قولوبنا الحب

انا لسه كفى بالامل ممدود

رغم السدود

رغم القيود

اقتباس